Хидротерапија, или уште се нарекува терапија со вода, претставува метод на лекување при кој се користи поволното дејство на водата (ладна, топла, водена пареа) врз севкупната состојба на организмот. Иако потекнува од античките времиња, поради своето благотворно дејство врз мускулатурата, кардиоваскуларниот систем и целокупната физичка кондиција, хидротерапијата денес има голема улога и во современата медицина. Д-р Аница Хаџи- Петрушева Јанкијевиќ, специјалист по физикална медицина и рехабилитација, вели дека целосната рехабилитација со употреба на вода е многу поедноставна и многу попријатна за пациентите кога вежбаат во вода.
„Терапијата во вода е пријатна, безбедна и ефикасна. Благодарение на дејството на водата, се намалуваат Земјината тежа и притисокот врз телото, со што се овозможува полесно и побезболно движење. Отпорот на водата ја зајакнува мускулната сила и го подобрува еластицитетот на меките ткива, што води кон побрзо и поквалитетно закрепнување. Хидротерапијата е одлична и за здрави лица, кои сакаат да го подобрат и зачуваат своето здравје“, вели д-р Хаџи-Петрушева Јанкијевиќ.
ТЕМПЕРАТУРИ НА ВОДАТА ШТО СЕ КОРИСТАТ ВО ХИДРОТЕРАПИЈА
Д-р Хаџи-Петрушева Јанкијевиќ објаснува дека постојат повеќе класификации на водата според загреаноста, и тоа:
- неутрална, каде што температурата е од 30 до 34 степени
- топла, со температура од 35 до 37 степени
- жешка, со температура на 38 степени
- ладна вода од 20 до 23 степени.
„Потопувањето во ладна вода најчесто се врши на дел од телото и се користи за забавување на локалните метаболички процеси, намалување на едемот и локализирање на воспалителниот процес. Влијанието на топлата вода, пак, ги подобрува метаболичките процеси, го намалува крвниот притисок, ја релаксира мускулатурата, го подобрува еластицитетот на меките ткива, го олеснува движењето во зглобните структури, дејствува смирувачки врз нервниот систем. Која температура на вода ќе се користи при третманот и во колкаво времетраење, зависи најнапред од состојбата што се лекува и од индивидуалните можности на самиот пациент“, вели д-р Хаџи-Петрушева Јанкијевиќ.
КАДЕ МОЖЕ ДА СЕ ПРИМЕНИ ХИДРОТЕРАПИЈА
Поради широкото дејство на водата, зависно од нејзината температура, индикациите за примена на хидротерапија се големи.
- При одредени гастроинтестинални заболувања, каде што се користи смирувачкото и релаксантно дејство на водата.
- При фебрилни состојби, со цел разладување на телото.
- Респираторни заболувања.
- Ревматски болести во хроничната фаза каде што се користи антиинфламаторното дејство на водата, се релаксира мускулатурата, се подобрува обемот на движење и се олеснува севкупната состојба на локомоторниот апарат.
- При рехабилитација во ортопедија, по имплантација на зглобни ендопротези на зглобови, каде што топлотното дејство на водата го подобува еластицитетот на меките ткива, го подобрува обемот на движење, а воедно и ја зајакнува околната мускулатура.
- Во третманот по скршеници и други травматски повреди, каде што поради намалување на притисокот во водата е можно правилно оптоварување и враќање во функција на повредениот екстремитет.
- Болките во ‘рбетот се една од најчестите тегоби со кои се сретнува човекот. Релаксацијата на грбната мускулатура и нејзиното правилно зајакнување во растоварена положба се значајни во третманот на оваа болна состојба.
- Пливањето е хидрокинезитерапевтски метод кој игра голема улога во превенција и спречување на развојот на деформитетите на ’рбетниот столб кај децата.
ШТО Е ХИДРОКИНЕЗИТЕРАПИЈА?
Изведувањето вежби во вода се нарекува хидрокинези. Вежбите може да се изведуваат во базени и да се вршат со помагала или без, во кади, подводни ленти или велосипеди. Изведувањето вежби на хидролента не само што е исклучително корисно за рехабилитација, туку сè почесто се користи и како подготовка во тренинг-процесите на професионалните и аматерските спортисти.
„Оваа терпија е поволна во започнување со физичка активност кај лица кои сакаат да ја намалат телесната тежина, или лица кои имаат болки во грбот и зглобовите. Основно е што се елиминира Земјината тежа, се намалува притисокот врз зглобовите, а при отпорот што го создава водата се јакне мускулатурата“, објаснува д-р Аница.
Центарот за физикална терапија и медицинска рехабилитација „Premium Physical Therapy & Sport Center“ при Клиничката болница „Аџибадем Систина“ располага со подводна хидролента, која овозможува спроведување хидротерапија со врвна медицинска поддршка. Оваа технологија е идеална за луѓе кои се на почетокот на физичка активност, се соочуваат со болки во грбот, зглобовите или ‘рбетот, или се во фаза на рехабилитација по повреди и операции.
